Diceva zì Viciénzo a don Camillo :
– ch’avite fatto, ve site mise ‘nziéme a chillo?
Primma dicéveve ch’era mmalamente,
e mό, abballate “còre a còre” alleramente?
È overo ca ‘nt’o munno, ‘a gente cagna spisso,
ma site cagnate vuje, o è cagnato isso?
Pè vuje ‘a pulitica ched’è, ‘na pazzièlla?
Basta ‘na cusarèlla, che ‘a vutammo a tarantella? –
O tanta vòte fosse ‘na pazziàta a palla,
va tutto bbuono, basta ca restammo a galla?
Sti’ cose ca se vedono, sό brutte e triste,
a “destra”, ca s’è ammiscata cu ‘a “sinista”.
E sunanno tutte ‘nziéme, ch’’e trumbette e ch’’e zampόgne,
zόmpano ‘a ccà ‘a llà, comme fόssero ranόgne.
Statt’accorta, cara Telese mia, amata e bella,
ca putisse fernì n’ata vòta dint’’a tièlla….
Pè sbruglià sta’ matassa, ‘ngraugliata accussì tanto,
ce vulesse ‘nu miracule, un miracolo di Santo.
Riccardo Affinito
