Suonno antico

0

In occasione dei festeggiamenti degli 80 anni del Comune di Telese, desidero contribuire pubblicando questo mio vecchio componimento. Auguri Telese!!

 

Suonno antico

 

Si ‘nzuonno me venesse nu penziero,

ca me purtasse arèto, ‘a tiempe antiche,

quanno criuturiélle dint’o quartiere,

ce currevamo appriesso pé dint’’e viche.

 

Quanno ce steva ‘a festa ‘e Sant’Antuniello,

c’’o palco ‘e frasche, tavule e bidune,

c’’allummata,‘o tturrone,  ‘e susamiélle,

‘e ‘nzerte ‘e castagne ‘nfilate a una a una.

 

Quanno Telese era campagna tutt’attuorno,

onn’Anniello sunava ‘o mandulino,

e puntualmente ogne miezujuorno,

sunava  sempe a sirena d’’o mulino.

 

‘A vita era na scampagnata dint’’e Lagni,

na ‘nchiuvata ‘e sòle fatt’’a Nunziéllo,

nu film americano all’Arena Bagni,

na fell’’e mellone addò zì Carmeniéllo.

 

Nu bicchier’‘e vino ‘nzieme a zì Giggino,

nu vestito nuovo cusuto ‘a Carminuccio,

na fiscata ‘e sera e zì Pascalino,

na chiagnuta ‘e criature, na ragliata ‘e ciuccio.

 

Na pulezzata ‘e via fatta ‘a Filumena,

na sunata ‘e trumbetta ‘e Pascale “muzzone”,

na curruta ‘e scugnizzi appriesso a nu treno,

Ferdinando Sciarra ca canta “Guaglione”.

 

Na magnate ‘e semiénte addó zì Ntuniella,

nu litro ‘e latte e zì Luiggella “mbullettóne”

nu gelato alla crema ‘o bar ‘e Santélla,

na sfuttuta ‘e Cenzino a Pascale “micióne.

 

Si stu suonno me venesse overamente,

allora lle dicesse “fa n’ata cosa,

portame ‘a via d’o laco nu mumento,

addo vasaje ‘a primma vota Angelarosa”.

 

E si restasse n’atu ppoco sulamente,

n’urdemo desiderio e niente cchiù,

“famme sunnà a Ninuccia e don Clemente,

‘nParaviso abbracciati cu Gesù”.

Riccardo Affinito

Questo sito usa Akismet per ridurre lo spam. Scopri come i tuoi dati vengono elaborati.