Il cantastorie di Vivitelese Riccardo Affinito
O Mammớne
Ce steva na’ vòta nu’ paisiello,
piccereniello, piccereniello,
appullaiato sott’a nu’ monte,
nun jate ‘e pressa, ca mớ v’arracconto.
‘A gente era bbona, gentile e curtese,
teneva rispetto pè chistu paese,
campava cu’ poco, felice e contenta,
e se vulevano bbene overamente.
Nu’ bellu juorno venette ‘o mammớne,
teneva ‘e ppezze arèt’’o cazớne,
arrivaje a cavallo a suono ‘e rancascia,
veveva e magnava a sette ganascie.
Arrassusìa che lớpa teneva,
n’ce steva cosa ca nun lle piaceva,
folleche, passere, sturne e picciune,
cuniglie, papere, pullastre e capune.
Cicerchie, cicere, pesiell’e fasule,
comme faceva ‘o sapeva isso sulo,
mele, pere, cachisse e crustate,
pummarole e patane fatt’’a ‘nzalata.
A’ fellata ‘e presutto c’’a fella ‘e mellone,
‘a mpepata ‘e cozze c’’o schizz’’e limone,
noce, nucelle e cuppetiell’allesse,
a barbera e aglianeca manch’era fesso.
Carne ‘e porco e carne ‘e vitella,
vulluta, arrustuta e dint’’a tiella,
pisce ‘e scoglie e pisce ‘e paranza,
e s’abbuffava tanta na’ panza.
Ma all’intrasatte ‘a dint’‘a foresta,
venette na’ fata e fernette sta’ festa,
acchiappaje ‘o mammớne ncopp’’o cchiù bello,
e dimane se magna ‘e coppol’‘e mbrello
.
Ma mớ ‘o paese se puzza d’’a fame,
cchiù nun se trova na’ tòzzola ‘e pane,
pisce, carne, menesta e cerase,
‘o mammớne ha fatto tabula rasa.
Sperammo ca chilli ca veneno appriesso,
tenessero core e nun facessero ‘o stesso,
e cagnassero ‘a sciorta e stu’ paisiello,
piccereniello, piccereniello.
